ꎭꂵꀘꂾ
ꁱꊿ:ꐚꑕꒈꎆ
ꀘꊿ:ꐚꑕꒈꎆ
ꎭꂵꀘꂾꆹꑞꂓꀋꐚ,ꉢꎺꇈꉈ,ꁡꇤꊿꆹꐭꀋꐥꒉꀋꐥꇬꏭꎭꂵꀘꂾꄹꇴꅷꇁ。ꃶꐚꃅꇬ,ꎭꂵꀘꂾꂓꄜꇬꆹꁡꇤꊿꀉꑌꈫꁁꌠꇬꀋꌧꌐꌠ,ꄚ,ꎭꂵꀘꂾꃅꉉꇬꆹꇬꀋꌧꌠꀋꐥ,ꄷꀋꁧꈍꐯꈋꉐ、ꈢꈐꈢꉈꊿꃅꇬꌥꌐ。ꋋꆹꎭꂵꀘꂾꆅꈻꋧꃅꎭ,ꍞꉃꂿꃅꎭ,ꏃꊰꀐꇬꄏ,ꉆꊰꇇꒉꌸꌠꌋꆀꐮꐞꀋꉆꌠ。
ꎭꂵꀘꂾꆹꁡꇤꐰꇑꌡ、ꎭꈓꌡ。ꁡꇤꊿꑍꌋꉖꍆꅀꈎꌋꆪꄐꄾꂿꅉꀕꎭꂵꀘꂾꎹ,ꐭꀘꅀꒉꀘꇬꑌꅉꀕꎭꂵꀘꂾꇴꏦꐥ。ꀘꄸꑊꄸꑊꋌꀱꈹꏿꌠꐥ,ꎭꂵꀘꂾꀘꅷꇁꇬꁡꇤꈍꄮꑌꆿꍯꂷꌵ、ꑌꑿꀻꎆ、ꊿꇫꋬꂻ!ꉈꑴꎭꂵꀘꂾꆹꀋꎪꀋꑴ、ꊿꂃꐙꒉꅿ、ꉌꂵꂄꑭꑌ,ꈁꀘꅉꇬꀘꃚꄏꌬꀕ,ꇤꉎꑌꇬꇤꐯꁨ,ꈁꀘꅉꇬꀮꅇꑌꉐꐛꃅꐛꑠꂷ。ꑠꐛꅹ,ꁡꇤꉹꁌꋍꏅꉬꇮꇬꉌꃹꇈꇬꁌꒉꌐ。
ꉢꀉꑳꌺꃅꄉꄮꇬ,ꀋꎺꇁꀋꉆꌠꆏ,ꎭꂵꀘꂾꅿꎸꃚꎸꏢꒌꄉꋠꄮꉬꀐ。ꋚꒌꋤꃃꍈꅑꌋꀊꉘꁮꏂꀍꀠꈹꐋꁥꌠꌋꆀꐯꇯꎆꉜꋚꉛꌩꏪꇓꏪꀕꄮꇬ,ꉪꊇꆹꅉꀕꃅꈍꃅꄉꎭꂵꀘꂾꅿꎸꃚꒌꋠꂯꌠꀉꄂꌌꐮꋯ,ꁡꇤꊿꀘꂠꌠꐥꄮꇬꆏ,ꉪꊇꆹꎭꂵꀘꂾꀘꌐꀘꀋꌐꌠꀉꄂꇁꉚ,ꀘꌐꏭꐛꄮꇬꆏ,ꉈꀕꃅꀥꌊꎭꂵꀘꂾꈝꃀꂴꆼꋍꄉꇬꈧꎸꀕꃅꇬꆏ,ꎭꂵꀘꂾꆹꋍꃢꋒꀋꋑꂁꑌꀋꂁ、ꁿꑌꀋꁿꃅꎸꃚꎸꏢꈧꌠꁸꌊꉪꊇꀉꑳꈧꌠꍈꇬꎷꑟꃅ。
ꀋꇴꀋꏢꃅꊭꌸꑠꃢ,ꆅꌦꆅꌋꈻꌋꑞꂷꌦꉢꀳꀋꐚ,ꉡꋌꎼꀑꉀꄓꀋꄚꃅꀙꐯꀙ。ꊂꑲꆀꌦꌋꊌꌠꉬꅊꇈ。ꀉꄉꀉꂿꆹꐒꀕꊀꀕꌋꆀ,ꃬꏿꑌꈁꄽꎭ,ꑿꇮꑌꈁꄽꏹ,ꌎꑻꑌꈁꄽꃅ,ꀁꇬꎇꃀꍅꑓꌌꆅꉃꌠꉬꄷꑌꈁꄽꉃ,ꉷꃅꑱꌜꑌꈁꄽꉜꈁꄽꅲꇫꈭꐨꁬꋌꆰꋌꑌꅝꇎꅝꅗꀐ,ꑠꃅꄷꇬꑌꄡꇗꇬꌒꏭꀋꉈ。ꊁꎭꂵꀘꂾꇴꌊꌦꌋꈜꇽ、ꒌꋊꆠꀠ、ꐰꇑꒌꁨꑠꋲꑟꃅꈁꄽꀘꑲꆀꋍꑍꋍꉙ、ꋍꈓꋍꉙꃅꌒꇁ。ꌦꌋꊌꇬꆹꀉꑌꌠꌒꈴꀋꄐꑠꑵ,ꌒꇬꑌꄡꇗꐂꀜꆏꐂꀜ,ꇇꊛꆏꇇꊛꑠꑵ。ꄚ,ꀃꑍꉡꆹꈍꃅꀥꈍꃅꐂꑌꑽꀋꐥ。ꄡꇗꁡꇤꇬꉠꀋꏯꆅꈻꀙꐯꀙꄉꎭꂵꀘꂾꀘꌒꌠꑌꀋꃷꎵ。
ꈍꑋꈎꊂ,ꉢꇓꈓꇬꄯꒉꌶꐺꑠꃢ,ꎭꂵꀘꂾꆹꀿꐊꎭꁻ、ꃀꐊꑱꍹꁧꀐꄸꈨꇁ,ꉪꏤꀁꇬꆹꎧꄣꃼꌊꇬꇰꇊꑴꄷ。ꑠꐛꅹ,ꉪꇊꎺꇊꎭꂵꀘꂾꄀꑲꆏ,ꅉꀕꉌꃀꐛꀋꌒꑟꃅ。ꉢꅉꐙ,ꎭꂵꀘꂾꆹꎧꁌꒉꄣꅼ、ꎧꉂꎧꅉꑠꂷ,ꉪꏤꀘꇁꇬ,ꀁꇬꌢꎭꄉꈁꁠꃪꆹꄷꎭꂵꀘꂾꏿꀋꋻ,ꀘꌐꄮꑲꆀꀉꂿꆹꎧꋍꏣꋋꏣꄌꎭꂵꀘꂾꁵꈝꃀꇬꄉꅝꁧꑟꃅ。ꀋꄸꄷ,ꀃꑍꋋꄮꆹꉬꑲꆏ,ꉢꈍꃅꑌꅉꀕꎧꋍꄣꇈꋍꄣꄹꃼꌊꎭꂵꀘꂾꑆꊋꀱꆹꀐꌠ。
ꀃꑍꋋꄮ,ꀘꂾꑲꆏꀘꂾꉬꇬꎷꌠꀋꉬ,ꀘꂾꎆꅔꋚꅔ、ꎧꅔꎸꅔꀑꀋꇿꑊꀋꈁꌠꑌꌐꀋꉆ,ꑍꇁꌔꇬꀘꐯꄀꑳꀋꌧꇬꑌꀁꀘꂾꉬꄷꌠꑌꌐꀋꉆ,ꀁꀘꂾꉬꄷꆺꒉꄇꒉꌠꑌꌐꀋꉆ。ꎭꂵꀘꂾꀋꏭꀘꋒꂠꋒ、ꀘꉔꑠꆹꐥꅉꀁꑌꅉꑟ,ꎭꂵꀘꂾꀋꏭꇗꁨꀺꁨ、ꋍꁯꈐꀋꄉꋍꁯꉈꀋꄉꃅꀘꌠꀘꂾꆹꐥꅉꀁꑌꅉꑟꀐ。ꋋꆹꊿꋍꈨꋋꈨꆏꇬꐥꑴꌦ,ꄚꋋꆹꃀꐚꈜꈤꌠꌋꆀꐯꌟ,ꊿꋍꈨꋋꈨꆹꃀꐚꀐ,ꄚꋋꆹꐥꍂꃅꇬꐥꌠꌡ,ꎭꂵꀘꂾꆹꃀꐚꀐꑴꇬ,ꋋꆹꐥꍂꃅꉪꊇꉌꂵꇬꀀ,ꁡꇤꃰꊿꉌꂵꇬꀀ,ꍂꇊꉹꅉꀕꃅꉪꈭꉪꇍꐥ,ꁡꇤꈭꇍꐥꄉꀋꑍꀋꈤꎂꀕ!